طرق حقيقية للعمل من المنزل عبر النت

بعد بحث طويل عن طرق العمل عبر الانترنت

(يجب ان اوضح انه عمل و مجهود حقيقى مقابل المال و ليست طريقة هبش اموال سريعة من الهواء )

  لقيت مواقع بتوفر الميزة دى سواء للى عندهم ظروف تمنعهم الالتزام بمواعيد العمل التقليدية او مش لاقيين شغل او عاوزين يحسنوا دخلهم
ملحوظة هامة..انت مش بتقدم سى فى من خلال المواقع دى كما هو شائع فى مواقع التوظيف المصرية المعروفة  ,انت بتعمل الشغل كله و تسلمه على النت من غير ما تبقى مجبر تتواجد فى مكان بعينه او ميعاد بعينه (الا اذا كان ده شرط واضح و محدد فى الشغلانة و ده قليل قوى على المواقع دى ) 

فى عدة مواقع لقيتهم ,مبتدفعلهمش فلوس فى الاول ولا بيجبروك تتفرج على اعلانات مقابل ملاليم ,انما شغل بجد هتاخد مقابله فلوس وهما هياخدوا نسبة م الاجر.. 

الشغل عن طريق المناقصات,اولا بتشتغل شوية على البورتفوليو/ السى فى بتاعك على الموقع و بعدين كل صاحب عمل بيقول الشغلانة اللى عنده و اللى عاوز يشتغل 

بيحدد لصاحب العمل المدة و الثمن اللى هيعمل له فيهم الشغلانة دى ,و صاحب العمل بيختار الانسب له و الموضوع مفتوح من كل الدول حول العالم فميزة هذه المواقع هى سوق العمل الواسع الغير مرتبط بظروف بلدك او اى حالة ركود فيها لان التعيينات من كل انحاء العالم
و لو انت اثبت انك كويس فى اللى بتعمله هتلاقى ناس هيا اللى بعتالك دعوة علشان تشتغل فى مشاريعهم من غير ما انت تقدم اصلا, 

و بيعملوا نظام تقييم ,انت تقيم صاحب العمل و صاحب العمل يقيم شغلك علشان يبقى مرجع لاى حد عاوز يتعامل مع اى حد فيكم  

و كمان بيحطولك مؤشر علشان يعرفوك مدى مصداقية صاحب العمل و قدرته على دفع المرتب اللى انت طالبه منه 

ممكن تلاقوا شغلانات زى داتا انترى بس بصراحة دى غالبا شركات هندية بتكسبها ,هتلاقوا شغل ترجمة (فى ناس بتطلب من انجليزى لعربى) و ديزاينرز طبعا 

او ممكن تلاقوا واحدة طالبة ان حد يبعتلها "اوفرز" للهنى موون بتاعها علشان مشغولة ..او تفرغوا فيديوهات مسموعة لكلام مكتوب او حد يشترى منكم قصة او سيناريو كاتبينه (علما بانه غالبا هيطلب ميحطش اسمك على العمل, الا فيما ندر) تكتب مقالات تمنتج حاجة تلعب فى صور بفوتوشوب,تصميم مواقع,

virtual assistant 

و غيرها كتير من الشغلانات اللى تتخيلها و اللى متتخيلهاش 

و ممكن اختيارى انك تاخد اختبارلتحديد المستوى فى حاجة معينة انت عاوز تثبت جدارتك فيها علشان تزيد ثقة المتعاملين معاك

المواقع دى:
Elance - Odesk - vworker - guru -freelancer 

و حتى مش هحط الريفيرينج لينكس بتاعتى , جوجلوا المواقع دى و حاولوا تستفيدوا منها .. انا اكتر اتنين استخدمتهم

 elance - odesk

انا قابلت ممثلة موقع ايلانس فى مصر وناس من اللى بيشتغلوا بيه فى مصر و هما قلة جدا .. و من خلال واحدة هناك عرفتنى بالاوديسك اللى بقيت بفضله عن الايلانس 

لان اوديسك بيديك عدد مرات اكتر فى الشهر انك تقدم فى وظايف و ده اكيد افضل علشان متيأسش وتحبط انك مش بيجيلك شغل بعد ما تكون استنفذت عدد مرات التقديم فى الشهر  
و انتم بتخشوا على المواقع دى خلى بالكم طويل خاصة فى البداية اعرفوا طريقة عمل المواقع دى و استوعبوها كويس وخدوا وقتكم فى الشغل على بروفايلاتكم عليها,
 محدش يقول معقول هيختارونى انا من بين الناس اللى بتقدم من حوالين العالم ..اه هيختاروك ,لانهم اختارونى و اختاروا كتير غيرى و مصريين و فى منهم لسه طلبة معهمش حتى شهادة جامعية لسه , و لو اثبت انك شاطر فى اللى بتعمله هيتحايلوا عليك تشتغل فى مشاريعهم و انت يا ترفض يا تقبل ..   
انا عملت شغلانة تعريب مواقع اليكترونية من خلال الاوديسك , الشركة كان اصلها اسبانى و انا عربت المواقع من انجليزى لعربى 
و كنت مصرة انى مقولش لحد على المواقع دى لحد ما اجربها و اتأكد منها بنفسى لان فى حاجات جربتها و طلعت نصب

اتمنى تكون المعلومة مفيدة لاى حد , و لو تعرفوا حد بيدور على شغل قولولهم على المواقع دى.. 

 

طريقة عمل كانيلونى حلو

حلو مقصود بيها انه صنف حلو مش انه "كويس" و هذا للعلم :D

فى قاعدة اساسية اتعلمتها بالنسبة للكانيلونى الحلو او الحادق هى اننا بنحط فى الخلاط الدقيق يكون فى كمية قده لبن و بعدين نضيف بيض..
 ممكن من 3-5 بيضات على نسبة كوبايتين لبن و كوبايتين دقيق

لو عاوزينه حادق بتضيفوا ملح و فلفل و ممكن جبنة و فى الحالة دى لما يكون الصنف حلو اضفت سكر و كاكاو 

و بالنسبة لى الجديد انى احط الكاكاو فى اصل العجينة مش فوق الكانيلونى العادى

و فى طاسة تيفال بتحطوا نقط زيت زيتون او اى بدائل تانية تحبوها و تكبوا طبقة خفيفة من العجينة و تفردوها فى الطاسة دقيقتين او اقل و تقلبوها على الوش التانى

ممكن تتاكل كده او تضيفوا اى صوص عليها 

اناهنا جبت طبقتين حطيت بينهم طبقة خفيفة جدا عسل و رشيت قرفة و جوز هند و قفلتهم و فوقهم رشة خفيفة جوز هند ..و بس كده     

نظرية :الانتصار على الاشياء الصغيرة فى رحلة مواجهتك مع مشاكلك الكبرى

يعنى اكيد كل واحد بيبقى عنده مشكلة ضخمة او اكتر او مربوط فى ساقية الحياة ..

.. و بالاضافة لده بيبقى فى حاجات تانية صغيرة بتنغص عليه حياته اليومية 

الفكرة انك تقفش الحاجات الصغيرة دى و تنتصر عليها علشان دماغك تبقى اروق فى مواجهة المشاكل الاكبر, ده غير انها بتديك احساس صغير بالانتصارو انك وقفت فى صف نفسك و نصرتها ع المنغصات الصغيرة,

 اول مرة خدت بالى م الفكرة دى كانت بسبب صندوق زبالة,اول انتصار صغير ليا كان ع صندوق زبالة !!! انا اوضتى مش كبيرة قوى بس كان كل يوم عندى مشكلة انى محتاجة صندوق زبالة جنب المكتب وواحد تانى جنب التسريحة ,

اد ايه قرار انى اشترى زبالة تانى رغم ان الاوضة من وجهة نظر الاخرين مثلا مش مستاهلة,كان ثمنه اقل من 20 جنيه فرق معايا ف حياتى اليومية جدا وسهلها, 

هى دى نوعية الحاجات الصغيرة اللى بتكلم عليها , مخدة مثلا بتنام عليها كل يوم و مش مريحاك , شبشب او جزمة بتستخدمهم بشكل يومى و بيضايقوك, فرشة سنان منتاش طايقها ,الميك اب او الاكسسوارات اللى بتستخدميهم و انت نازلة كل يوم محطوطين بشكل مش سلس للاستخدام اليومى (انا ساعدنى فى حل مشكلتى مع الاكسسوارات عليقة ماجات كنت بعلق عليها الاكسسوارات) او ممكن كرسى العربية بيحرّك ممكن تشتريله قاعدة خشب بتساعد على التهوية ,سلسلة المفاتيح بتتزحلق منها المفاتيح و غيرها كتير من التفاصيل 

تغيير التفاصيل الصغيرة دى بيفرق جدا .. جربوا و مش هتندموا ..فكروا ايه اكتر حاجة بتدايقكم فى حياتكم اليومية و غيروه فى اقرب وقت و استمتعوا بانتصاركم الصغير وسط منغصات الحياة الكبيرة ..و دمتم   

جيلى اناناس بالكيوى

ده طبق جيلى مخصوص ..التريكّة فيه ان ده جيلى اناناس, و هو على النار بقطع الكيوى و اسيبه يغلى معاه فالكيوى بيبقى طرى وبيسيب فى طعم الجيلى نفسه نكهة لطيفة

مكرونة سباجيتى ووايت صوص مع الخضراوات

ميزة الطبق ده انه بياكله الناس اللى مبتحبش الخضار قوى ..جربته على اتنين اخويا و انتيمتى و هما ملهمش فى الخضار و عجبهم

 

و كنت عاملة جنبهم فراخ متبلة و طلعتهم من التتبيل قليتها فى زيت ويتون من غير بقسماط ولا دقيق ولا حاجة ..معرفش هل ده عادى ولا ممكن يصيب المتخصصين فى الطبيخ بصدمة عصبية بس على العموم طلعت حلوة و خفيفة جدا !!

سلطات تونة

تيراماسو

Layer 1 : I like to start with something solid to hold the layers so I go for a chocolate cake with Cinnamon , apple juice & raisins

layer 2 : danette vanilla,very thin layer just to glue it to the coming layer 

layer 3 : Dima biscuits with butter soaked in apple juice

layer 4: 7aleeb mokathaf ydoob ms7 3aleeh dark chocolate mabshoora

layer 5 :the biscuits soaked in Nutella + whipped cream

layer 6 : 7alawa sha3r 

layer 7 :biscuits soaked in cappuccino 

layer 8 :marshmallows madroob fl 7'laat m3 whipped cream w 7leeb mkthaf

layer 9 : caramel 

layer 10 : biscuits soaked in the rest of the cappuccino + nutella

layer 11:cream shanteeh + Milka caramel madrobeen fl 7'alat w foo2hom ba2y el bar bta3 milka mtkasar tkseer 7'afeef w mtnatwar 3l wesh..you neeي to keep it in the fridge for a while before serving 

 I'm done .. wishing you a happy diet .. mwahahahahahaha

لقطة بحبها ف فيلم باب الشمس لما نهيلة بتقولهم :"من الاول"..مش عيب تبتدى من الاول ..بس لما تكرر نفس الغلطات اللى وصلتك للنتيجة دى تبقى حمار

‎:D‏

و ما البروكلى الا.. قرنبيط اخضر

الواحد يبقى ماشى فى حاله ,كافى خيره شره ..يطلعله رغيف بلدى سخن و يقوله بمنتهى الميوعة " مش عاوز حتة"

حين لا تجدوا الكريم شانته فى 3 محلات مختلفة..قولوا على الدنيا السلام !

انا عندى اعتراف بخصوص سنووايت,انا طول عمرى كنت بشوف مرات ابو سنووايت احلى منها فمكنتش شايفة مبرر لغيرتها منها

اللى يجوجل .. ياما يشوف

اما السباجيتى و الفراخ بانيه..او الفوضى

قصة طائر الرخ-قصة قبل "النوم"

كل بلد ليها حاجة بتبقى "مفخرتها" قصاد الدول التانية ..الحاجة دى ممكن تبقى مكان فى البلد ,او منتج بتتميز بيه او صناعة او اكلة او عادة عند اهل البلد..و فى حالة البلد اللى بنتكلم عليها فالبلد دى مشهورة بحيوان او بمعنى اصح طائر ..البلد دى عندها اخر طائر رخ موجود فى العالم !!!

كان فى البداية طائر الرخ مأنتخ مبيعملش حاجة غير مهمة افتتاح المؤسسات الرسمية و المصانع الكبرى و ينفخ التورتة فى اعياد ميلاد الكبارات فى البلد وغيرها من المناسبات و كان بيفرض على الناس يودوله اكل و هدايا كتير عمال على بطال بصفته الرخ عالى المقام واجب الاحترام ..

.. ولكن الناس ابتدت تتململ من ده لانهم مش لامسين اى فايدة حقيقية للرخ  ففى يوم اجتمع الكبرات مع الرخ لمناقشة ذلك فى محاولة لايجاد دور ليه يقربه من الشعب .. فطلب الرخ منهم ان يتولى يوميا مهمة توصيل الاطفال من و الى مدارسهم"ليحميهم "من مخاطر الطرق ورغم ان هذه الدولة تتمتع بمعدل منخفض جدا من حوادث الطريق لان لديها كوادر جيدة من السائقين الا ان   

يومها هلل الجميع فرحا و رقصوا طربا و الكل  قعد يتصور جنب الرخ العظيم و امتلأ الجميع بالفخر

و بسرعة ظهرت اغانى تمجد الرخ و كان اغربها  "الرخ هيوديهم المدارس ..من على ظهره للمدارس "!!!  

و كانت الامهات بيتفننوا فى تجهيز ابنائهم صباحا و بيعملوا اجود الساندوتشات ليعطوها للرخ قبل ما يعملوا ساندوتشات اطفالهم

و كانت وسائل الاعلام تتفائل باذاعة التحية التى يلقيها الرخ على الامهات و هو يحمل الاطفال خلف ظهره كل صباح..

وبعد اسبوع حينما قام الرخ برحلة العودة من المدارس للمنازل عاد الاطفال جميعا ما عدا عبد الله 

فذهبت ام عبد الله للكبارات و قالتلهم ان ابنها مرجعش ..قالولها اياكى يكون قصدك ان الرخ ليه دعوة بالموضوع ده احنا عارفينه من زمان ثم ان عبد الله ابنك ده شقى و لعبى تلاقيه زوغ فراحت الجامع و اخدت الميكروفون و عرفت اهل البلد كلها ان عبد الله مفقود فاضطر الكبارات بتقسيم الناس للجان للبحث عن عبد الله و فعلا لقوه متشحور فوق جبل من الجبال و لما فاق قال أنا قلت للرخ ان الطريق اللى هو بياخده لتوصيلنا كل يوم ده مش أأمن طريق خاصة انه بين جبال بتخليه يميل يمين و شمال كتير و اكتر من مرة كانوا هيقعوا ..فالرخ رد عليه بانه ميعرفش طريق غيره بس وعده انه هيدور على طريق احسن.. و لما ركب فوجىء ان الرخ زحلقه من فوق ديله ووقعه على الجبال !!!!! وطلع عماد صاحب عبد الله واكد ان كلام عبد الله صح وقبل ان يهم صلاح بتأكيد قصة زميليه زغرت له امه فانكتم..و قعد جدل داير لكن الاغلبية مصدقوش واتهموهم  بالمبالغة و اعتذر الرخ و قال انه عمره ما ممكن يوقع طفل عمدا ابدا و انصرف الجميع بعد الليلة الطويلة دى ..

لكن ام عبد الله و ام عماد وحتى ام صلاح و عدد قليل من اصدقائهم و جيرانهم و اقرباؤهم قرروا الا يذهب اولادهم على ظهر الرخ للمدارس مرة اخرى

و مرت شهور ثم حدث حادث اخر غريب فحينما حط الرخ صباحا هرس تحت مخالبه الطفل دانيال و اصيب الاطفال جميعا بالذعر لكن الرخ لام دور برد شديد اصابه فلم يتحكم فى هبوطه على الارض 

فقام البعض بالتهليل للرخ الذى قام بدوره فى توصيل الاطفال رغم دور البرد  اللى اصابه و قالولهم خسئتم ,ده الرخ "حمى "الاطفال

لكن هذا لم ينفع كثيرا ام دانيال و قلة ساعدوها فى لملمة اشلاء ابنها من على الطريق

و فى يوم من الايام تأخر الرخ كثيرا فى العودة بالاطفال فخرجت ام عبد الله و ام دانيال و قالوا للامهات ان افضل ما يقومون به للاطمئنان على ابنائهم هو الذهاب لمقر الرخ و فى الطريق كانت الامهات بيلاقوا احذية و شنط اطفالهم مبعثرة فى الطريق فبدون ترتيب او اتفاق بدأت الامهات فى التقاط اى عصيان خشبية تقابلهم

و لما وصلوا لمدخل الكهف سمعوا اصوات صراخ اطفالهم و الدماء فى كل مكان و الرخ بيمصمص فى الاطفال واحد تلو الاخر 
ولما رأهم الرخ بدأ يتراجع و ينمكش و ينكمش ويصغر حجمه من الرعب لحد اما بقى فى حجم نسر صغير و قعد يخربش فيهم شوية و يعافر لكنهم تمكنوا منه و حطوه فى قفص و احتضنوا اطفالهم او من تبقى من اطفالهم و عادوا الى البلد و حكوا لهم عما حدث  ..فاذا بالجميع يتنصل من الرخ و ينكر معرفته باصله و يلوم من قبل بفكرة توصيله للاطفال و يكيل له السباب  ..

لم تعد البلدة مشهورة بالرخ بعد الان ..انما ذاع صيتها بالنساء اللاتى يرتدين السواد اللى قضوا على الرخ

     

لماذا لن اذهب الى الحفل الفلانى فى المكان العلانى

 ساسرد لكم لماذا لن اذهب الى الحفل الفلانى فى المكان العلانى ... 

 ======================================

(فقرة هذى متواصل لا تحتمل المقاطعة ..او التأجيل) 

تأتيكم على البلوج و على تويتر فى نفس اليوم و الاصدار

 

للذهاب للمكان الفلانى على ان اسلخ الدب بحجرتى ..و هذا سيصيبه بنوبة برد و عطاس ستزعجنى لاحقا تلك الليلة

يجب ان تكون هناك ليموزين سوداء ممتدة لتوصلنى و تنتظرنى بالخارج ..فانا لا احتمل الانتظار بالبرد خارجا ..و مع الاسف لا يوجد مكان للركنة هناك

  فتضطر ان تركن ابعد بقليل مما يحدث دوما سوء توقيت بين خروجى و وجود السيارة امام باب الخروج ..مهزلة..اعلم ..حدثونى عن ذلك لساعات حول مأسيكم الشخصية المتعلقة بهذا الصدد

 لا اجد رافعة لترفع شعرى عدة طوابق لتحجب الرؤية ثلاث صفوف خلفى ..كما يجب ان يكون رفع الشعر

 من اين لى الان سرعة ضبط و احضار خادمة و اقوم بعمل سلسلة جراحات تجميلية لها لتشبه الفليبينيات للمحافظة على الرقى و تشجيع المنتج المحلى !

الكلب اللولو الابيض من اكثر المتضررين من هذا الحفل ..اصطحبته معى فى حفلات مماثلة سابقا و اكدت للقائمين انه سميع وذواقة لهذا النوع من الموسيقى و اكدت انه سيلتزم باداب المكان اكثر مما سيفعل معظم ضيوفهم

و ان سلوكياته ليست كالكلاب السوقية التى اعتادوا التعامل معها و لكنهم دوما يرددون بغباء ..انها التعليمات!

فارسله ليقضى فترة الحفل مع الخادمة المصرية الفليبينية فى الليموزين بالخارج و يصاب بالاكتئاب فحين نعود يخاصمنى و يجلس بمفرده متخليا عن حذره

و هنا ينتقم الدب الذى نزعت فروته بان يلتهمه على غفلة منى .. فتصاب الخادمة بصدمة و تموت من فورها ..

فينتحر سائق الليموزين لارتباطه العاطفى بها..

 

لهذا لن اذهب الى الحفل الفلانى بالمكان العلانى..

ليبقى الوضع كما هوعليه..

ساضحى بالحفل.. ليعم الفرح والسرور

 

 

انتهى البث

شاطىء للسيدات

اعزائى المواطنين , ندعوكم لمشاركتنا فى موعدنا السنوى للسباحة فى مية السلاطة 

ملحوظة :

يوجد شاطىء خاص بالسيدات اللى لسه فاكرين ان ده اكثر امانا

الحلول دائما بسيطة و قدام عينينا ..بس نفكر

جلست افكر و افكر .. اتارى التفكير بيجيب نتيجة ..و بالفعل وجدت الحل لهذه المشكلة .. لقد كان الحل دوما امامى .. الحل هو الشيكولاتة طبعا .. لو الشيكولاتة معرفتش تحل المشكلة دى يبقى مين هيقدر يحلها

ابتسامات

#

جلسا امامه فى مكتبه فى الموعد المحدد لهما توالت الاسئلة .. و حين سألهما : فى اى جانب ستكونون اذا قامت حرب بين دولتكم الان ووطنكم الجديد ؟ 

نظرت اليه بجوارها و ابتسمت ابتسامة هادئة وواثقة ... سارا فى الشارع يمسكون بايدى بعضهم البعض .. هذا هو السؤال اللى قطع كل قلق و توتر و كذلك ترتيبات الشهور الماضية .. مش هنسيب مصر

#

وقفت ممسكتة بكوب النسكافيه الصباحى المعتاد و راقبته و هو يحلق ذقنه و ابتسمت له فتوقف عن الحلاقة ليبادلها الابتسامة .. رفعت كوبها و اخذت رشفة  و لا يدور بذهنها سوى قهقهات عالية على هذا المغفل الذى لا يدرى شيئا

#

 قطعت الصمت بسؤالها .. تفتكر احنا مناسبين لبعض , تبدلت ملامحه غضبا : جاية تسألينى دلوقتى نظرت الى الساعة , نهضت بسرعة و توجهت نحو التلفاز .. انه موعد المسلسل.. انه يوم عصيب بالنسبة لها فاليوم الحلقة الاخيرة و حتى الان انها لاتعرف ماذا ستصنع فى حياتها بعد انقضاء حلقاته الثلاثين .. شاهدت الحلقة باهتمام شديد و مع تتر النهاية مالت برأسها الى الوراء و على وجهها ابتسامة ارتياح فقد  جائت النهاية كما كانت تتمنى تماما و اراحت عيناها قليلا .. او ربما  كثيرا , فهى لم تفتحهما حتى الان 

ساعة زمن

,  ثلاث ساعات فقط لا غير .. هذا هو "راكورى"* اليوم لعدد الساعات التى انامها

مبزودش عن كده ليه ؟ .. انا مش قلت انه راكور ! حد يغير الراكور برضه ده اسمه كلام

بس احيانا فى بعض الظروف التى تنتهك فيها حرمة الراكور رغم انف الجميع و كان اليوم احد تلك الايام

طبقت يومين متواصلين و ورايا حاجات مهمة فى اليوم الثالث .. طب و بعدين مليش مزاج لانهيار عصبى دلوقتى و ان كانت التجربة دى هتفيدنى كتير فى كتابى اللى ناوية أألفه .. اكثر من 100 طريقة لتدمير ساعتك البيولوجية..المهم اخدت قرار فى وقتها ممكن يوصف بانه اخطر و اهم من قرار تأميم قناة السويس لولا عدم وجود شهود من محللين سياسيين و خلافه للتأريخ لهذا القرار الذى اتى فى وقت حيوي جدا من اليوم  .. انا هنام ساعة واحدة بس و بعدها هقوم اكمل ..

 ( هيكون تعاون لطيف من القارىء انه يتخيل موسيقى تصويرية مؤثرة تتناسب مع اهمية القرار دلوقتى )

طيب انا فيا عادة مهببة انى بسيب الموبايل مفتوح و انا نايمة تحسبا لاى طارق .. لمؤاخذة قصدى طارىء .. مين طارق ده .. اظاهر ان اثار عدم النوم بدأت تظهر

طيب لما اكون هنام ساعة واحدة بس , اسيب الموبايل مفتوح برضه ؟؟

قرار صعب .. معقول اقفله ..طب انا هقفل الصوت .. دى ساعة بس .. هقفل الفايبريشن كمان .. و حطيته جنبى على المكتب لكن فى الدقائق الاولى من تواجدى بالسرير كانت عينى بتروح ناحيته كل شوية يمكن يكون بينور و فى حاجة مهمة  ثم سمحت لبطانيتى ان تغمى عيناى .. دى ساعة يعنى .. و قد كان 

خخخخخخخخخخخخخخخخخخ( شخير لمدة ساعة ) و المنبه الى فى الموبايل رن و صحيت

و كان الوضع كالاتى 

رسائل :

- رسالتين كلمنى شكرا

- ميعاد مقابلة تحددت مع احد الشخصيات الهامة

- استفسار هام محول موعد غدا

- استفسار عن ايميلى

تليفونات :

- حاجات مطلوبة للرقابة

- محاولات يائسة من اصدقائى الوصول لى

 - كنت مكلفة حد يجيبلى حاجة و كان محتاج بيانات اكتر علشان يخلص المشوار

- عدد من المكالمات  بخصوص ورق هام للسفارة  

- مجموعة ارقام مجهولة يا اما اتجاهلها يا اما اتصل و انا و نصيبى بقى يا مهمة يا نمرة غلط على حبة انت طلبتنى ,اصلك طلبتينى الاول طب انتى مين .. طب انت اللى مين و التهام كامل لبقايا رصيدى المهترىء

دى ساااااااااااااااعة .. ساعة يا ظلمة

الكون هيتبدل فى ساعة نمتها ... طظ فى كل الامور التى اختارت ان تكون مهمة و مصيرية فى هذه الساعة

و ادى اخرة اللى يغير الراكور..

-----------------------------------------------------------------------

* الراكور هو الشىء الثابت الذى لا يصح تغييره و هو مصطلح يستخد فى مجال العمل بالسينما و التليفزيون