الحل الامثل لمواجهة ظاهرة التحرش :
مش هنقول التربية لانها مفعولها بينتهى مع ارهاصات المراهقة وسطوة ثقافة الشلة و القطيع
و برضه مش هقول الوازع الدينى لانه محدش بيتأثر بيه غير ايام مباريات منتخب الكرة و بس
...
الحل هو تدريب الفتايات على التحرش .." ايون" انت قريت صح مش غلط
لنربى جيلا من الفتايات منزوعات الحياء قادرات على اصابة الرجال بتوتر حيال وجودهم فى شوارع مصر المخروسة ( بالخاء مش الحاء )
ربما لو شعر الرجال بقدر الاهانة و الضيق الذى يتسببون به لعلهم يرتدعون
..
اذا اوجدنا فى الشوارع نوع من العدائية تجاه الذكور موازى للعدائية الموجهة للنساء سنخلق نوع من التوازن !!!!! فيصبح كل منهم/منهن منشغل بحاله و بالحفاظ على نفسه من العابثين.. و العابثات
و يصبح الجميع فى حالة تأهب للرد على الاساءة ..باوسخ منها
فتبقى الامهات و الابهات يقولوا لولادهم يرجعوا البيت بدرى علشان فى شلة بنات بايظين واقفين على الناصية
و يأكدوا عليهم ان لو فى شغله كل اللى معاه بنات يسيب الباب مفتوح علشان مفيش واحدة تنتهز الفرصة
و يمشى على الرصيف و فى النور و ميقعدش لوحده مع صاحبته مهما اكدتله انها بتحبه لذاته
و لو البياعة فى السوبرماركت حاولت تجر معاه كلام ناعم ميرضش و ميديهاش وش
و لو حصل وواحدة مدت ايدها عليه يشتمها و يعلى صوته و يلم عليها الخلق ( اللى مبيتلموش ) و يهددها انه هيبلغ عنها البوليس ( اللى مبيتبلغش برضه)
مش عارفة ازاى محدش فكر فى الحل ده
.. و سلملى على مفاهيم المساواة كلها واحد واحد وواحدة واحدة
هناك 3 تعليقات:
طيب واحد زى حالاتى ايه ذنبه
علاقتى بالتحرش كانت معاكسات رخامة مش قلة أدب أيام إرهاصات المراهقة
أعمل ايه دلوقتى وفيه بنات بتتحرش بيا فعلا
يا أستاذ هرطقة .. ماعرفش تعليقي ده حيوصلك ولا لأ .. لكن إنت شايف إنك ماليكش ذنب فعلا؟ أشك. ولو ماعندكش ذنب فعلا ده مش سبب كافي ان الفساد والظلم واختلال الموازين مايطولاكش.
واتقوا فتنة لا تصيبن الذين ظلموا منكم خاصة.
مش لازم تكون عملت مصيبة عشان يتعمل فيك .. سكوتك وعدم فعلك إنك تمنع ظلم ده في حد ذاته ظلم .. والظلم بيطول الكل .. لما يتسكت عليه. ولا احنا أبواق مفتوحة بس في السياسة وفساد الحكام وحق المواطن في رغيف العيش وحق المواطن في التصويت والانتخاب وحق غزة في المقاومة والكلام الكبير اللي معظمة أجوف أومنظرة؟
احنا كمان غزة. واحنا كمان تحت الحصار .. متحاصرين في بيوتنا ولبسنا وشوارعنا متحاصرين بعيون وأيادي مغتصبة غاصبة ملعونة .. واتكتب علينا جدار فلاذي عازل من الصمت والعار!
و كويس إنك معترف بإرهاصات المراهقة اللي إنت اقترفتها .. اللي إنت بتشوفه ده مجرد نبذة مختصرة من اللي احنا بنشوفه كل يوم .. إنك تحس إنك كائن مستدهف وإن الكل مستبيحك لأغراض وتأويلات ومبررات مريضة خسيسة في أنفسهم ده رعب يومي من الطفولة لحد الله أعلم امتى .. غالبا لحد مانموت.
إنت مش شايف إن مدلول المصيبة و إن السرطان يستفحل ويتوحش لدرجة إنه إنت كمان تطولك مجموعة متحرشون بلا حدود "بعنصريها" ده وراه حاجة أكبر من مجرد إنك ماليكش ذنب؟؟
معلش .. علاقتك بالتحرش ومعاكسات الرخامة "البسيطة البريئة" اللي انت مستهون بيها ده حتفضل تدفع تمنها لحد ماتعمل حاجة توقفها بجد وتمنعها عنك وعننا.
وربنا يعافيك ويعافي أختك وأمك وبنتك ومراتك وكل أهل بيتك ويعافينا من الظلم والسكوت عليه.
مش ممكن انتى ضحكتينى جدا .. انا موافقة و هحلق شعرى !!
إرسال تعليق